Tones: M = mid, HR = high-rising, H = high, HF = high-falling, LF = low-falling
| Isaan | Pronunciation | Tones | Thai | English/Notes | #occ |
|---|---|---|---|---|---|
| เพื่อ | phʉ:a | H | เพื่อ | for Notes: the vowel เอือ is likely to be a Thai loan; pronunciation: also realized as เพี่ย |
29/23 |
Link to overview page
Link to dictionary
Basic vocabulary — Page 30 — Series B, pictures 05: soldier
อันนี้กะบ่ฮู้ว่าเป็นทะหานอยู่ปะเทดใด กานแต่งโตของปะเทดใดเนาะ ทะหานในลูบแบบนี้
ทะหานมีหน้าที่อี่หยัง ทะหานกะมีหน้าที่ดูแลบ้านเมียง หลือว่าดูแลความปอดพัย หลือว่าซ่อยลบ ซ่อยอี่หยังในเลี่ยงของกานต่อสู้ หลือว่าสงคามเนาะ
แล้วซุดของทะหานหนิสีอี่หยัง ซุดของทะหานใส่หนิ ส่วนมากแล้วสิเป็นสีเขียวเนาะ เขียวแก่ๆ หลือว่าเขียวเข้มๆ ออกสีตับหมูหน่อยหนึ่งเนาะ
กะใส่เสี้ย เป็นเสี้ยแขนญาวพ้อม ใส่ส้งขาญาวพ้อม แล้วกะมีหมวกป้องกันโตพ้อม แล้วกะมือสองข้างหนะกะถือปืนไว้พ้อมเนาะ เพื่ออาทิสิเอาไว้ป้องกันโตหลือว่าญิงพุล้ายเนาะ
Basic vocabulary — Page 29 — Series B, pictures 11-12: star, moon, sky
อันนี้คืออี่หยัง อันนี้เป็นลูบดาวเนาะ
กะสิมีห้าเหลี่ยมนำกันเนาะ ดาว ปกกะติแล้วกะสิมีห้าเหลี่ยมเนาะ กะมีห้ามุมห้าเหลี่ยมเนาะ เป็นลูบดาวเนาะ
แล้วลูบดาวหนิมันสีอี่หยัง ลูบดาวหนิเป็นสีขาวเนาะ เป็นสีขาว ขาวจุ่นพู่นอยู่ สีงามซ้ำแมะเนาะ สีบ่สดใส บ่ดำ บ่มืด บ่มัวเนาะ
แล้วลูบดาวหนิมีไว้เฮ็ดหญัง อาดสิมีไว้ถ้าปะดับตกแต่งในญามจัดบอดหลือว่าจัดห้องอี่หยัง เฮากะสามาดเฮ็ดเป็นลูบดาว เฮ็ดลูบต่างๆ หลือว่าลูบดาวแบบนี้กะได้
12
อันนี้คืออี่หยัง อันนี้เป็นอี่เกิ้งเนาะ อี่เกิ้งสีเหลียง เหลียงเอ้อเฮ้ออยู่เนาะ
เป็นลูบอี่เกิ้งเคิ่งหนึ่ง เขาเอิ้นว่าอี่เกิ้งเคิ่งเสี้ยว หลือว่าดวงจันเคิ่งเสี้ยว
กะอยู่เทิงท้องฟ้าพุ้นหละวา แล้วกะอยู่ล้อมลอบด้วยดวงดาวเนาะ กะสิมีดาวหลายดวงล้อมอี่เกิ้งนี้ไว้อยู่ อาดสิอยู่เทิงฟ้า หลือว่าอาดสิติดไว้นำฝาผะหนังหม้องใดหม้องหนึ่งกะได้ เพื่อตกแต่งให้มันเบิ่งงามตา งามหูงามตา หลือว่าให้มันมีสิ่งที่ปะดับตกแต่งเนาะ
Basic vocabulary — page 12 — Series B, pictures 06-07: pot, to cook
นี้คืออี่หยัง นี้คือหม้อ หม้อสีขาว ใบบักใหญ่หนึ่ง
หม้อใบนี้มีฝาพ้อม มีหูจับพ้อม มีหูจับสองข้าง
หม้อเฮ็ดมาจากอี่หยัง หม้อเฮ็ดมาจากเหล็ก หม้อเฮ็ดมาจากพะสะติกบ่ได้
เฮ็ดมาจากเหล็กเพื่อว่าให้ทนความฮ้อน สามาดอยู่เทิงไฟได้
หม้อใซ้เฮ็ดอี่หยังได้แน่ หม้อเอาไว้เฮ็ดแนวกิน เอาไว้เฮ็ดได้หลายอย่าง ปะโยดมันกะมีหลายอย่าง เอาไว้ต้มกะได้ เอาไว้แกงกะได้ เฮ็ดได้หลายอย่างคัก
7
เขากำลังเฮ็ดหญัง เขากำลังเฮ็ดแนวกิน
หม้อใบนี้ค้างอยู่เทิงไฟ ไฟมันกำลังลุกบักแฮงหนึ่ง
เขาเอาฝาหม้อปิดอยู่เทิงหม้อพ้อม แล้วอยู่ในหม้อกะมีควนไฟลอยขึ้นมา ลอยขึ้นมาบักคักหนึ่ง ควนสีขาวลอยขึ้นไปเทิงหม้อ
แล้วเขากำลังเฮ็ดอี่หยังอยู่หนี้ เขากำลังต้มอยู่ เขาอาดสิต้มแนวกิน จักต้มอี่หยังกะบ่ฮู้ อาดสิต้มไข่ ต้มปากะได้ บ่ลู้คือกันว่าเขาต้มอี่หยัง
แล้วมันฮ้อนบ่ กะฮ้อนอยู่ เพาะว่าเขาค้างหม้ออยู่เทิงไฟ
ขั้นมันบ่ฮ้อน กะเฮ็ดแนวกินบ่ได้ เพาะสะนั้นแล้ว มันต้องฮ้อน แนวกินมันจั่งสิสุก
BCF06 Expressing thanks (2) — Description
ก่อนที่เฮาสิเว้า ขอบคุณ หลือ ขอบใจ กับใผนั้น คนพุนั้นเขากะอาดสิมาซ่อยเหลียเฮา หลือเฮ็ดอี่หยังให้เฮาบางสิ่งบางอย่าง แล้วเห็นลูบพาบนี้กะสิฮู้ว่า เป็นหญังพุหญิงคนนี้เขาคือขอบคุณพุซายคนนี้ กะเพาะว่าพุหญิงคนนี้ เขากำลังสิเฮ็ดงานบางสิ่งบางอย่าง แต่เขาบ่สามาดเฮ็ดได้ พอพุซายคนนี้เห็น เขากะเลยอยากซ่อย อยากซ่อยเหลีย เพื่อว่าสิซ่อยให้งานของพุหญิงคนนี้เลียบล้อย หลือเส็ดลุล่วงไปด้วยดี พอพุซายคนนี้ซ่อยงานของพุหญิงเส็ดเลียบล้อยแล้ว พุหญิงคนนี้กะบ่มีอี่หยังตอบแทนนอกจากใซ้คำว่า ขอบคุณ
ขั้นพุซายคนนี้อายุส่ำกันกับพุหญิง พุหญิงเขากะอาดสิเว้าว่า
— ขอบคุณหลายๆ เด้อ
— ขอบคุณหลายๆ เด้อจ้า
แต่ว่าขั้นพุซายคนนี้มีอายุน้อยกว่าพุหญิงคนนี้ พุหญิงคนนี้ เขากะอาดสิเว้าว่า
— ขอบใจหลายๆ เด้อ
— ขอบใจหลายๆ เด้อจ้า
แต่ว่ากะสามาดเว้าได้อีกอย่างหนึ่งว่า
— ขอบใจหลายๆ เด้อ ที่มาซ่อย
— ขอบคุณหลายๆ เด้อ ที่มาซ่อย
เฮากะอาดสิสามาดเว้าได้ปะมานนี้เนาะคับ
Basic vocabulary — Page 03 — Series B, pictures 01-03: chili, to cut, to eat, spicy
นี้คืออี่หยัง นี้คือบักพิก บักพิกน่วยเดียวข้อหล้อ บักพิกมันมีน่วยเดียว
บักพิกน่วยสีหญัง บักพิกน่วยสีแดง น่วยของบักพิกมันเป็นสีแดง แต่ว่าขั้วนของบักพิกมันเป็นสีเขียว
บักพิกเอาไว้เฮ็ดหญัง บักพิกเอาไว้ถ้าเฮ็ดแนวกิน เอาไว้ถ้าปุงอาหาน หลือไว้ถ้าเอาไว้ถ้าเฮ็ดเป็นแนวกินนั้นหละ
บักพิกมันมีลดซาดเป็นจั่งใด บักพิกลดซาดมันสิเผ็ดๆ เผ็ดคักอี่หลี บางน่วยกะเผ็ดหลาย บางน่วยกะเผ็ดหน้อย
บักพิกญามมันสุกแล้วมันสิเป็นน่วยสีแดง ญามมันดิบอยู่ มันกะสิเป็นน่วยสีเขียว
2
เขากำลังเฮ็ดหญัง เขากำลังหั่นบักพิก
มีคนคนหนึ่ง เขาใซ้มีดหั่นบักพิก เขาเอามีดหั่นลงไปกางน่วยบักพิก หลือว่าหั่นเคิ่งของน่วยบักพิก
เขาสิเอาบักพิกนี้ไปเฮ็ดหญัง เขาอาดสิเอาไปเฮ็ดแนวกิน หลือว่าสิเอาไปปุงเป็นแนวกินนั้นหละ เพื่อว่าสิให้ลดซาดมันมีลดที่จัด หลือว่าลดซาดของแนวกินนั้นเผ็ดๆ ขึ้น
3
เขากำลังเฮ็ดหญัง เขากำลังกัดกินบักพิก
เขากัดกินบักพิกเฮ็ดหญัง จัก จักคือกัน จักว่าเขากินเฮ็ดหญัง เขาอาดสิซิมเบิ่งว่ามันเป็นลดซาดจั่งใด เขากะเลยกัดกินบักพิก
เขากัดกินจั่งใด เขากะเอาบักพิกเข้าปากของเขา แล้วเขากะกัด ใซ้แข้วกัดน่วยบักพิก แล้วเขากะอาดสิซิมเบิ่งว่ามันสิเป็นลดซาดจั่งใด สิเผ็ดบ่ สิหวานบ่
เขากินบักพิกจักน่วย เขาอาดสิกินน่วยเดียว เพาะว่าเห็นอยู่มือของเขาจับบักพิกน่วยเดียวหนึ่ง
Basic vocabulary — Page 29 — Series B, pictures 08-10: to study, book
เขากำลังเฮ็ดหญัง กะมีเด็กน้อยพุซายคนหนึ่งเนาะ อาดสิเป็นเด็กน้อย อันนี้ หลือว่าอาดสิเป็นพุใหญ่แล้ว กะบ่ฮู้จัก กะแนมบ่ค่อยซัดปานใดเนาะ แนมบ่ค่อยเห็น เขากำลังเฮ็ดหญังอยู่ เขากำลังเลียนหนังสืออยู่ นั่งโต่ะอยู่ นั่งเก้าอี้อยู่เนาะ แล้วกะนั่งอยู่โต่ะนั้นหละ นั่งอยู่ข้างหน้าพ้อมเด๊ นั่งกำลังเลียนหนังสืออยู่
เขาเลียนวิชาหญังตอนนี้ อาดสิเป็นคะนิดตะสาดเนาะ อาดสิเป็นคะนิด เลียนคะนิดอยู่ เห็นเขามีโตเลขหลายๆ อาดสิเป็นกานคำนวน กะสิเกี่ยวกับคะนิดตะสาด วิชาคะนิดสาดเนาะ
แล้วเขาเลียนอยู่กับใผ เขากะเลียน อาดสิอยู่กับหมู่ อยู่หลายคน แต่ว่าใน[ที่]เห็นอยู่ตอนนี้คือเขานั่งอยู่โต่ะพุเดียว หมู่อาดสินั่งอยู่[ข้างหลัง] อาดสินั่งอยู่โต่ะข้างหลังเนาะ
มือข้างขวากะจับปากกา กำลังเขียนอยู่สะหมุดหนังสือเขาอยู่เนาะ
9
เขากำลังเฮ็ดหญัง กะมีพุซายพุหนึ่งเนาะ ใส่เสี้ยสีเหลียง กำลังอ่านหนังสืออยู่ อาดสิตั้งใจอ่านหนังสือเพื่อที่สิสอบ หลือว่าอ่านหนังสือเพื่อทบทวนความลู้ หลือว่าให้มันมีความลู้ในสะหมองเนาะ
เขาอ่านหนังสือเกี่ยวกับวิชาหญัง เบิ่งลักสะนะแล้วอาดสิเป็นกานคำนวน วิชาคะนิดตะสาดเนาะ หลือว่าคะนิด หญังที่มันเกี่ยวกับคำนวน หลือว่าฟิสิก หลือว่าอี่หยังกะได้เนาะ
10
แล้วเขากำลังเฮ็ดหญังอยู่ มีพุซายพุหนึ่งเนาะ เขากำลังจับหนังสืออ่านอยู่
เขาอ่านอยู่กับใผ กะจักคือกัน อันนี้เฮากะบ่ฮู้เนาะ เขาอาดสิอยู่พุเดียว หลือว่าอยู่บ้าน หลือว่าอยู่ในห้องเลียนของเขา
Basic vocabulary — page 21 — Series B, pictures 10-13: toilet, shower, to shower, to dry oneself
นี้คืออี่หยัง อันนี้เป็นโถส้วม อันนี้เป็นโถส้วม
โถส้วมนี้เอาไว้ถ้าเฮ็ดหญัง โถส้วมนี้กะมีปะโยดหลาย มีปะโยดคัก
ขั้นพุใดท้องเสีย หลืออยากเข้าห้องน้ำ หลือปวดเญี่ยว กะสามาดนั่งอยู่โถส้วมนี้ได้ หลือขี้หลือเญี่ยวอยู่ในโถส้วมนี้
อันวางตั้งอยู่ข้างๆ โถส้วมกะสิเป็นถังน้ำ มีน้ำอยู่ในหั้น แล้วกะมีขันพ้อม
ญามเฮาขี้แล้ว หลือเญี่ยวแล้ว เฮาอยาก[สิ]ทำความสะอาด หลือล้างโถส้วมนี้ เฮากะตักน้ำ เอาขันตักน้ำอยู่ในถังนั้น แล้วกะมาลาดลงอยู่ในโถส้วม
11
นี้คืออี่หยัง อันนี้เป็นฝักบัว เขาเอิ้นว่าฝักบัวอาบน้ำ
เขาเอาไว้ถ้าเฮ็ดอี่หยัง กะเอาไว้ถ้าอาบน้ำ หลือทำความสะอาดล้างกาย
12
นี้คืออี่หยัง อันนี้เป็นสะบู เป็นสะบูเหลว
เอาไว้ถ้าเฮ็ดหญัง เอาไว้ถ้าอาบน้ำ หลือไว้เอาทำความสะอาดล้างกาย
และสะบูนี้มันมีกิ่นหอมบ่ กะหอมอยู่ ขั้นมันมีกิ่นเหม็น คนกะสิบ่ใซ้ ขั้นมันมีกิ่นหอม คนกะสิมัก คนกะสิเอามาใซ้ เพื่อที่สิให้ล้างกายเฮาหอมๆ หลือเฮ็ดให้โตเฮาหอมนั้นหละ
13
เขากำลังเฮ็ดหญัง เขากำลังเซ็ดโต
เขาเซ็ดโตเฮ็ดหญัง เขาอาดสิอาบน้ำหัวกะแล้ว เขากะเลยสิเซ็ดโต
เพื่อว่า เขาอาบน้ำหัวกะแล้ว โตของเขากะสิเปียก มันสิมีน้ำติดอยู่โตของเขา เขาอาดสิอยากให้โตเขาแห้ง เขากะเลยสิเซ็ดโต เพื่อว่าโตเขาสิได้แห้ง เขากะเลยเอาผ้าเซ็ดโตนี้มาเซ็ดโตให้มันแห้ง
Basic vocabulary — Page 25 — Series B, pictures 11-13: to build, house, bridge, wall
เขากำลังพากันเฮ็ดหญัง เขากำลังพากันส้างบ้านส้างเฮียน หลือว่าเฮ็ดบ้านเฮ็ดเฮียนนั้นหละ
เขากำลังเฮ็ดอยู่จักคน เขากำลังเฮ็ดอยู่สามคน สองคนกะอยู่เทิงเฮียนพุ้นหละ กำลังตอกนั้นตอกนี้ จับนั้นจับนี้ อีกคนหนึ่งกำลังยื่นไม้ขึ้นไป กำลังส่งไม้ขึ้นไปเทิงๆ พุ้นหละ อีกพุหนึ่งกะส่ง อีกพุหนึ่งกะฮับ กำลังส้างบ้านส้างเฮียนอยู่
เขากำลังส้างหนิส้างแล้วไป่ บ่ เขากำลังส้าง กำลังเฮ็ด บ่ทันได้แล้วง่ายดอก หัวกะเฮ็ด หัวกะส้าง
แล้วเขาเฮ็ดเป็นบ้านหญัง เขาเฮ็ดเป็นบ้านไม้ เฮียนไม้ บ่แม่นบ้านปูนดอก มีสองซั้นพุ้นแหล้ว ข้างล่างกะเฮ็ดโล่งโจ่งอยู่ แต่ว่าหม้องคนอยู่สิเทิงๆ หลือว่าอยู่ซั้นสองพุ้นหละวา
12
เขากำลังพากันเฮ็ดหญัง เขากำลังพากันส้างสะพาน หลือว่าเฮ็ดสะพาน
เขาเฮ็ดสะพานเฮ็ดหญัง เขากะเฮ็ดสะพานเพื่อว่าสิเฮ็ดไปข้ามน้ำ หลือว่าข้ามแม่น้ำ
ขั้นบ่มีสะพาน เฮากะบ่สามาดที่สิญ่างข้ามแม่น้ำนี้ไปได้ เพาะว่า น้ำมันกะลึก เพาะสะนั้นแล้วเฮาต้องเฮ็ดสะพาน เพื่อที่ว่าเฮาสิได้ญ่างข้ามแม่น้ำนี้ไปได้
13
เขากำลังเฮ็ดหญัง เขากำลังเฮ็ดฮั้ว หลือว่าส้างกำแพง หลือว่าส้างฮั้วเนาะ
อาดสิเป็นฮั้วบ้าน กำแพงบ้านกะได้
เขากำลังเฮ็ดอยู่พุเดียวข้อหล้อ บ่มีฮอดคนซ่อยเฮ็ด
เขาเฮ็ดเป็นกำแพงอี่หยัง เขาเฮ็ดเป็นฮั้วอี่หยัง เขากะเฮ็ดเป็นฮั้วปูน เขาใซ้ปูนมาเฮ็ดให้เป็นฮั้ว
ฮั้วนี้เฮ็ดเป็นไม้ได้บ่ กะได้อยู่ บางคน หลือว่าลังคนกะเฮ็ดเป็นฮั้วไม้ บางคนกะเฮ็ดเป็นฮั้วปูน แล้วแต่คนมัก แล้วแต่คนอยากสิเฮ็ด
BCF05 Expressing thanks (1) — Description
คำว่า ขอบคุณ นี้ สิใซ้ได้สำหลับทุกคน เด็กน้อยเว้ากับพุใหญ่ พุใหญ่เว้ากับเด็กน้อย หลือพุใหญ่เว้ากับพุใหญ่ ญกโตอย่างเซ้น ขั้นเด็กน้อยเว้ากับพุใหญ่ เด็กน้อยกะอาดสิเว้าว่า
— ขอบคุณหลายๆ เด้อคับ
— ขอบคุณหลายๆ เด้อจ้า
ขั้นพุใหญ่เว้ากับเด็กน้อยกะอาดสิเว้าว่า
— ขอบคุณหลายๆ เด้ออี่หล้า
— ขอบคุณหลายๆ เด้อบักหล้า
ขั้นพุใหญ่เว้ากับพุใหญ่กะสิเว้าปกกะติ กะอาดสิเว้าว่า
— ขอบคุณเด้อ
— ขอบคุณหลายๆ เด้อ
แล้วกานเว้าขอบคุณนี้กะสิเว้าอีกอย่างหนึ่ง กะมีคำว่า ขอบใจ คำว่า ขอบใจ นี้ สิบ่สามาดเว้าได้ทุกคน สิสามาดเว้าได้เป็นบางคน อย่างเซ้น พุใหญ่เว้ากับเด็กน้อย พุใหญ่เว้ากับพุใหญ่ หลือคนที่มีอายุหลายกว่าเว้ากับคนที่มีอายุน้อยกว่า คนที่มีอายุน้อยกว่าบ่สามาดเว้าคำว่า ขอบใจ กับคนที่มีอายุหลายกว่าได้ เขากะอาดสิเว้าอย่างเซ้น
— ขอบใจเด้อ
— ขอบใจหลายๆ เด้อ
— ขอบใจหลายๆ เด้อคับ
— ขอบใจหลายๆ เด้ออี่หล้า
— ขอบใจหลายๆ เด้อบักหล้า
ทุกคนกะอาดสิเว้าแบบนี้ หลือสิเว้าตามนี้กะได้เนาะคับ
Basic vocabulary — Page 24 — Series B, pictures 05-08: shop/store, food stall, clothes, hairdresser
นี้คืออี่หยัง อันนี้คือล้านขายของ หลือว่าล้านสะดวกซื้อเนาะ
ในล้านนี้กะสิมีหลายสิ่งหลายอย่าง หลือว่าขายหลายสิ่งหลายอย่างอยู่ในล้านอันนี้
ญามเฮาต้องกานอี่หยัง หลือว่าอยากซื้ออี่หยังที่มันเป็นสิ่งน้อยๆ หลือว่าซิ้นน้อยๆ แน่ๆ เนาะ เฮากะสามาดที่ไปซื้ออยู่ในล้านอันนี้ได้
แล้วล้านขายของอันนี้เปิดตะหลอดเวลาบ่ กะแล้วแต่ล้าน บางล้านกะเปิดยี้สิบสี่ซั่วโมง หลือว่าเปิดเบิดมื้อเบิดค่ำ แต่ว่าบางล้านกะเปิดซั่วคาว หลือว่าเปิดได้ญามมื้อเว็นส่ำนั้น
6
นี้คืออี่หยัง อันนี้คือลด เป็นลดขายแนวกิน หลือว่าลดขายกับเข้าเนาะ
แล้วเป็นหญังเขาคือมาขายเทิงลด เป็นหญังเขาคือขายของอยู่เทิงลด กะจักคือกัน เขาอาดสิบ่มีเป็นล้านขาย เขากะเลยมาขายอยู่เทิงลด เพื่อที่ว่าเขาสิได้ขายแนวกินนั้นเอง
แล้วเขาขายอี่หยังแน่ กะขายเป็นแนวกิน ขายกับเข้าเนาะ อาดสิเป็นขายอาหานตามสั่งกะได้ ที่คนอยากกินอี่หยังกะไปสั่งเขา แล้วเขากะสิได้กินแนวอันนั้นเนาะ
7
นี้คืออี่หยัง อันนี้กะเป็นล้านขายของ แต่ว่าเป็นล้านขายเสี้ยผ้าเนาะ กะขายหลายสิ่งหลายอย่างเกี่ยวกับเสี้ยผ้า หลือว่าแนวใส่ หลือว่าแนวนุ่งห่มเนาะ
กะอย่างเซ้นมีเสี้ยผ้า มีเทิงส้งแน่ มีเสี้ยแน่ มีเกิบแน่ มีหลายสิ่งหลายอย่างเกี่ยวกับแนวใส่ของคนเนาะ
8
นี้คืออี่หยัง อันนี้กะเป็นล้านคือกัน ล้านตัดผม
อันนี้เป็นล้านตัดผมเนาะ เป็นล้านบอลิกาน เพื่อที่ว่าสิให้คนมาตัดผม
แล้วในล้านนั้นแนมเข้าไปหนะสิมีอี่หยังแน่ กะมีคน มีคนสามคน คนหนึ่งกะนั่งอยู่เทิงโต่ะ เพื่อที่ว่าสิให้สั่งตัดผม มาตัดผมให้เจ้าของ คนยืนอยู่หั้นกะเป็นซ่างตัดผม ยืนอยู่หั้นกะเพื่อว่าสิตัดผมให้ลูกค้าเนาะ แล้วกะอีกคนหนึ่งนั่งอยู่เคาเต้อ อาดสิเป็นพะนักงานเก็บเงิน หลือว่าพะนักงานคิดเงินนั้นเอง
Basic vocabulary — Page 02 — Series B, pictures 16-20: TV, remote control, to switch on/off, to watch TV
นี้คืออี่หยัง อันนี้คือโทละทัด อันนี้เป็นโทละทัด โทละทัดจอแบน โทละทัดเคี่ยงบักใหญ่หนึ่ง ใหญ่กะด้อกะเดี้ย
ปะโยดของโทละทัดกะมีหลายสิ่งหลายอย่างอยู่ เอาไว้ถ้าเบิ่งข่าว ไว้ถ้าเบิ่งกาตูน ไว้ถ้าเบิ่งอันนั้นอันนี้ได้หลายสิ่งหลายอย่าง
โทละทัดมันลาคาแพงบ่ กะแพงอยู่ แพงหลาย แพงคัก ขั้นบ่มีเงินกะซื้อบ่ได้ เพาะว่ามันแพงหลาย
17
นี้คืออี่หยัง อันนี้เป็นลีโหมด อาดสิเป็นลีโหมดโทละทัดกะได้
ลีโหมดเป็นแบบใด ลีโหมดกะเป็นสี่เหลี่ยม อันน้อยๆ เอาไว้ถ้ากด กดเกี่ยวกับโทละทัด หลือว่าใซ้งานคู่กับโทละทัด
ลีโหมดกะอาดสิเอาไว้ถ้าเลี้ยนซ้อง หลือว่ากดไปซ้องนั้นซ้องนี้ หลือว่าเพิ้มเสียงลดเสียง หลือว่าใซ้ไว้ตั้งค้าอันนั้นอันนี้กะได้
18
เขากำลังเฮ็ดหญัง เขากำลังเปิดโทละทัด เขาใซ้มือของเขากดลีโหมด เพื่อว่าเปิดโทละทัด เขาอาดสิอยากเบิ่งโทละทัด เขาเลยสิเปิดโทละทัดนี้
แล้วเขาอยู่ไกโทละทัดบ่ เขาใซ้ลีโหมดกดเปิดโทละทัดอยู่ไกโทละทัดคักบ่ บ่ บ่ไกหลาย ขั้นลีโหมดกับโทละทัดอยู่ไกกันหลาย สันญานมันกะสิบ่ฮอดกัน กะสิบ่เซี้ยมต่อกัน เพาะสะนั้นแล้ว ลีโหมดกับโทละทัดกะสิอยู่ใก้ๆ กัน
19
เขากำลังเฮ็ดหญัง เขากำลังเบิ่งโทละทัด
พุซายคนนี้เขากำลังเบิ่งโทละทัด กำลังจ้องเบิ่งโทละทัด กำลังแนมเบิ่งโทละทัด
เขาอยู่กับใผ เขาอยู่พุเดียว เขาเบิ่งของเขาพุเดียวข้อหล้อ บ่มีฮอดหมู่ อยู่พุเดียวอ้อยต้อย
20
เขากำลังเฮ็ดหญัง เขากำลังปิดโทละทัด
เขาปิดโทละทัดเฮ็ดหญัง เขาอาดสิบ่เบิ่งโทละทัดนี้แล้ว เขากะเลยปิดโทละทัดกะได้
เขาปิดโทละทัดจั่งใด เขาใซ้ลีโหมด หลือว่าใซ้มือของเขากดลีโหมด เพื่อว่าสิปิดโทละทัด
เป็นหญังเขาต้องปิดโทละทัดญ้อนลีโหมด เพาะว่าลีโหมดหนะมันมีปุ่มกดปิดโทละทัด หลือว่าปุ่มกดเปิดโทละทัด
แต่ว่าขั้นเฮาบ่อยากกดลีโหมดนี้ เฮากะไปปิดอยู่หม้องโทละทัดกะได้ อยู่โทละทัดมันกะสิมีปุ่มเปิดหลือว่าปุ่มปิดโทละทัดอยู่ เฮากะสามาดไปปิดหลือไปเปิดอยู่หม้องโทละทัดกะได้ แต่ว่าขั้นเฮาบ่อยากญ่างไปโทละทัด เฮากะจับลีโหมดนี้ แล้วกะปิดหลือว่าเปิดโทละทัดกะได้
Basic vocabulary — page 22 — Series B, pictures 05-08: hospital, ambulance, doctor, nurse
นี้คืออี่หยัง อันนี้เป็นโลงบาน
อันนี้คือเอิ้นว่าโลงบาน หลือว่าโลงพะยาบาน
ส่วนมากแล้ว พุใดสิเฮ็ดงานอยู่ในหนี้ พุใดสิเฮ็ดงานอยู่ในโลงบานนี้ คนที่เฮ็ดงานอยู่ในหนี้กะสิมีแต่หมอ มีแต่พะยาบาน หลือมีอีกหลายหน้าที่ที่แตกต่างกันไป
อาดสิมีแม่บ้าน หลือว่ามีญาม หลือคนลับส่งคนไข้กะได้
แล้วโลงบานนี้ หลือว่าหม้องนี้ ส่วนมากแล้วพุใดสิมาหนี้ ส่วนมากแล้วคนปกกะติเขาสิบ่ค่อยไปโลงบาน เพาะว่าคนที่ไปโลงบานนี้ กะมีแต่พุป่วย หลือว่าคนไข้ คนที่บ่ซำบาย แล้วกะคนที่ตวดโลกตวดพัยนั้นหละ
6
นี้คืออี่หยัง อันนี้เป็นลดโลงบาน หลือว่าลดลับส่งคนไข้
อยู่เทิงหลังคาลดนั้น เขาเอิ้นว่าอี่หยัง เขาเอิ้นว่าหวอ เป็นหวอ
แล้วหวอนี้มีไว้เฮ็ดหญัง หวอนี้กะค้ายๆ กับลำโพง เอาไว้ถ้าส่งเสียง หลือเปิดเสียง เพื่อให้คนได้ญินว่านี้คือเสียงลดโลงพะยาบาน หลือว่าลดลับส่งคนไข้
กะอาดสิเป็นสันญะลักบอกว่าให้หลบทาง ให้หลบทางไปแน่ ให้หลบทางไปก่อน อันนี้เป็นลดโลงบาน มีคนป่วยอยู่ในหนี้ หลบทางให้แน่ หลบทางไปให้แน่
แล้วลดคันนี้ หลือว่าลดโลงบานนี้ กะสิเป็นค้ายๆ กับลดตู้เนาะ คันบักใหญ่ คันใหญ่อยู่ เพื่อที่สิสามาดให้คนป่วยหลือคนไข้นอนได้
แล้วอยู่ข้างๆ ลดกะสิติดอุปะกอนต่างๆ หลือติดสันญะลักต่างๆ เพื่อที่สิให้คนฮู้ว่า นี้คือลดโลงบาน นี้คือลดคนป่วย นี้คือลดคนไข้ หลือติดสันญะลักของโลงบานหนั้นหละ
7
นี้คือพุใด อันนี้เป็นหมอ เขาเอิ้นว่าคุณหมอ
หน้าที่ของหมอนี้เฮ็ดอี่หยัง หมอนี้กะมีหน้าที่ลักสาคนป่วย ลักสาคนไข้ ลักสาได้หลายโลก
แล้วกะแล้วแต่หมอพ้อม แต่ละหมอกะเฮ็ดหน้าที่บ่คือกัน บางหมอกะลักสาโลกไต บางหมอกะลักสาโลกตับ บางหมอกะเป็นหมอฟัน บางหมอกะเป็นหมอผิวหนัง แล้วแต่หมอ แล้วแต่เพิ่นสิลักสาด้านใด
8
อันนี้คือพุใด อันนี้เป็นพะยาบาน เป็นนางพะยาบาน
นางพะยาบานนี้มีหน้าที่อี่หยัง กะมีหน้าที่ดูแลคนไข้คือกัน
แต่ว่าสิมีหน้าที่น้อยกว่าหมอ อาดสิดูแลคนป่วย ดูแลคนไข้ เอายาให้คนไข้กิน หลือว่าตวดเซ็กล้างกายของคนไข้หนั้นหละ
สิมีหน้าที่หลือบดบาดน้อยกว่าคุณหมอ
Basic vocabulary — page 20 — Series B, pictures 16-20: school, student, teacher, to pay respect
นี้คืออี่หยัง อันนี้เป็นโลงเลียน เบิ่งซงแล้วเป็นลักสะนะของโลงเลียน
แล้วเด็กน้อยมาเฮ็ดอี่หยังอยู่โลงเลียน เด็กน้อยนักเลียนมาเฮ็ดอี่หยังอยู่โลงเลียน กะมาเลียนหนังสือ
โลงเลียนเป็นหม้องให้ความฮู้ ขั้นเด็กน้อยมาโลงเลียน กะสิได้ความฮู้ ขั้นบ่มาโลงเลียน กะสิบ่ได้ความฮู้ กะสิปึก
โลงเลียนนี้มีจักซั้น โลงเลียนนี้มีสองซั้น มีซั้นหนึ่งกับซั้นสอง
เสาอยู่ข้างหน้าโลงเลียนนั้นเป็นเสาอี่หยัง เป็นเสาทงซาด ทุกโลงเลียนในปะเทดไทยสิมีเสาทงซาด เป็นเสาเคาลบทงซาดอยู่หน้าโลงเลียน แล้วกะมีทงซาดอยู่เทิงหลักเสานั้นพ้อม
เสาอันนี้กับทงซาดอันนี้เอาไว้เฮ็ดหญัง เอาไว้ยืนเคาลบทงซาด ทุกมื้อเวลาสองโมงเซ้าที่นักเลียนไปโลงเลียน เด็กน้อยต้องมายืนเคาลบทงซาดอยู่หนี้ แล้วกะล้องเพงซาดของปะเทดไทย
17
นี้คือพุใด เขาเป็นพุใด เขาเป็นใผ เขาเป็นเด็กน้อยนักเลียน เป็นนักเลียน
เขาใส่ซุดนักเลียนอยู่ ตอนนี้เขากำลังแต่งซุดนักเลียนอยู่
แล้วเขาถืออี่หยังอยู่ เขาถือกะเปา เป็นกะเปาถือ เป็นกะเปาถือของนักเลียน
18
นี้คือพุใด อันนี้เป็นเด็กน้อยนักเลียน เป็นเด็กน้อยนักเลียนพุหญิง
เขาใส่ซุดอี่หยังอยู่ เขาใส่ซุดนักเลียน พุหญิงสิใส่ซุดนักเลียน แล้วกะใส่สิ้นพ้อม เป็นสิ้นกะโปงนักเลียน
แล้วในมือของเขานั้นถืออี่หยังอยู่ ถือกะเปานักเลียน เป็นกะเปานักเลียน เขากำลังถืออยู่
19
นี้คือพุใด อันนี้เป็นคู เป็นอาจาน
คูมีหน้าที่เฮ็ดหญัง คูมีหน้าที่สอน สอนหนังสือเด็กน้อยนักเลียน ให้นักเลียนมีความฮู้ ให้เด็กน้อยเลียนหนังสือเก่งๆ แล้วกะซ่อยบอกซ่อยสอนเด็กน้อยนักเลียน ให้เป็นคนดี แล้วกะตั้งใจเลียน
เห็นดำๆ อยู่ข้างหลังอาจานนั้นเป็นอี่หยัง เป็นกะดานดำ เอาไว้เขียน หลือเอาไว้สอนนักเลียน
สีขาวๆ ที่เขียนอยู่นั้นคืออี่หยัง เป็นซ่อก เอาไว้เขียนลงไปในกะดานดำนั้น ให้มันเกิดโตหนังสือ หลือให้เกิดสิ่งที่เฮาสิสอนลงไปในนั้น
20
เด็กน้อยนักเลียนกำลังเฮ็ดอี่หยัง กำลังไหว้อาจาน กำลังทำความเคาลบอาจาน
เขาเฮ็ดเฮ็ดหญัง เขาไหว้อาจานเฮ็ดหญัง เขากะไหว้เพื่อที่สิทำความเคาลบอาจาน
เด็กน้อยนักเลียนทุกคนที่อยู่ในโลงเลียนนั้น ขั้นพ้ออาจานคนใด ต้องไหว้ หลือสะหวัดดีอาจาน เพื่อทำความเคาลบ
Basic vocabulary — Page 32 — Series B, pictures 11-13: garlic, to peel, to cut/slice
อันนี้คืออี่หยัง อันนี้เป็นกะเทียม
กะเทียมหัวหนึ่ง
กะเทียมนี้มันเป็นอี่หยัง มันกะเป็นพืดอย่างหนึ่งเนาะ เป็นแนวปุง ปุงอาหาน ให้มันมีลดซาด หลือว่าให้มันมีกิ่นอีกแบบหนึ่ง แล้วแต่คนมัก บางคนกะบ่มัก บางคนกะมักเนาะ มันสิมีลดแซบๆ เผ็ดๆ จักหน่อยหนึ่งเนาะ กะเทียมเนี้ย เอาไปไว้ไปปุงแนวกินเนาะ
ในกะเทียมหัวหนึ่งเนี้ย มันกะสิมีแย้กออกไป เป็นกีบๆ เนาะ
ในหัวหนึ่งกะสิมีหลายกีบ ลังอันกะมีเจ็ด แปดกีบ ลังอันกะเป็นสิบกีบ
แล้วเฮากะเอาไปปุงอาหาน บางเที่ยกะใส่เป็น ใส่เที่ยละกีบ สองกีบ สามกีบกะได้ บางเที่ยกะใส่แต่ละหัวกะได้ ขั้นปะลิมานแนวกินมันหลายเนาะ
แล้วอันขาวๆ อยู่ขอบๆ มันเนี้ยเป็นอี่หยัง อันนี้อาดสิเป็นแบบว่า เป็นเปียกมันกะได้ หลือว่าเป็น บ่แน่ใจ กะอาดสิเป็นเปียกมัน
แต่ว่าอันขาวๆ เนี้ยกินบ่ได้เนาะ ก่อนเฮาสิเฮ็ดแนวกิน เฮากะต้องแกะออกก่อน แกะเปียกมันให้แกะอันสีขาวๆ คาบมันเนี้ย แกะออกก่อน แล้วเฮากะใส่อันข้างในมันที่มันเป็นเนี้ยเหลียงๆ หลือว่าเป็นในมันหละเนาะ แล้วกะไปปุงแนวกิน
12
เขากำลังเฮ็ดหญัง กะมีคนคนหนึ่ง เขากำลังแกะ แกะเปียก หลือว่าแกะคาบกะเทียมเนาะ
เป็นหญังเขาต้องแกะเปียกมันออก หลือว่าแกะอันขาวๆ นั้นออก เพื่อว่าอันนั้นมันกินบ่ได้ กะต้องแกะออก หลือว่ามัน เขาบ่พากันกินเนาะ เขากะเลยแกะออกไป แล้วกะสิใส่แต่ในมัน หลือว่าน่วยอันที่มันเป็นกีบเหลียงๆ นั้น เอาไปกินส่ำนั้นเนาะ
13
เขากำลังเฮ็ดหญัง กะเขากำลังหั่นกะเทียมเนาะ หั่นกะเทียมเป็นซิ้นน้อยๆ เป็นซิ้นน้อยๆ
เขากะเอามากีบเดียว เอามากีบเดียว แล้วกะหั่นๆๆๆๆ ให้มันเป็นซิ้นน้อยๆ
เขาอาดสิบ่อยากตำ บางคนกะเอาไปตำกะได้ บางคนกะเอามาหั่น มาสับๆๆๆ กะได้ แล้วแต่สิ่งที่เขาถะหนัด หลือว่าสิ่งที่เขาต้องกาน ที่สิเอาไปเฮ็ดเนาะ
Basic vocabulary — Page 30 — Series B, pictures 18-20: to wash one’s face, to brush one’s teeth, to comb one’s hair
เขากำลังเฮ็ดหญัง กะมีพุหญิงเนาะ เป็นพุหญิงดอก มัดผมจุกพ้อมเด่ะ ฝั่งซ้ายกะฝั่งขวา มัดเทิงสองข้างเนาะ เขากำลังล้างหน้าอยู่
อาดสิล้างอยู่ห้องน้ำ อาดสิล้างอยู่ในบ้านเขาหละ อาดสิเป็นห้องน้ำบ้านเขาหละ กำลังล้างหน้าอยู่
กะใซ้มือสองข้างหนะ จับหน้าขึ้นมา แล้วกะ เออ จับน้ำขึ้นมาเนาะ แล้วกะล้างๆๆ หน้าของเขา
เป็นหญังเขาคือล้างหน้า เขาอาดสิหัวกะตื่น หัวกะตื่นนอน แล้วกะล้างหน้า เพื่อสิเฮ็ดให้มันสดซื้น เพื่อที่สิเฮ็ดให้หน้ามันสดซื้นเนาะ แล้วกะบ่ให้มีอี่หยังติดหน้า หลือว่าไขมัน หลือว่าเหงี่ยอี่หยังติดหน้า เฮากะสิล้างเอาความสกกะปกออกไปเนาะ
19
พุหญิงคนนี้กำลังเฮ็ดหญัง กะมีพุหญิงพุหนึ่งเนาะ พุหญิงคนนี้หละกำลังแปงฟัน
กำลังแปงฟันใซ้แปงสีฟัน ใซ้ยาสีฟัน แล้วกะแปงๆๆๆ แปงแข้วของเขาเนาะ
แล้วเขาแปงอยู่ใส กะอาดสิแปงในห้องน้ำบ้านของเขาเนาะ ตอนนี้เขากำลังอยู่หน้า อาดสิเป็นหน้ากะจก หลือว่าอยู่หน้าชักโคก อุ้ย บ่แม่น อยู่หน้าอ่างล้างหน้าเนาะ บ่แม่นหน้าชักโคกเนาะ เขากำลังแปงฟันอยู่
แล้วเขาแปงฟันเฮ็ดหญัง เขากะแปงฟันเพื่อที่ว่าสิให้แข้ว หลือว่าปากของเขาสะอาดเนาะ คนตื่นนอนมาใหม่ๆ กิ่นปากมันกะสิมีอยู่ เพื่อที่ว่าสิทำความสะอาดแข้ว หลือว่าทำความสะอาดปากของเฮา บ่ให้มันมีกิ่นเหม็นอยู่ในแข้ว ซอกแข้วของเฮา เฮากะต้องแปงฟัน แปงแข้ว เพื่อที่สิให้แข้วเฮาสะอาด หลือว่าบ่มีกิ่นเหม็นหลายปานใดเนาะ
20
เขากำลังเฮ็ดหญัง กะมีพุหญิงพุหนึ่งเนาะ กำลังหวีผม
กำลังหวีผมอยู่ กะใซ้มือข้างหนึ่งจับหวี แล้วกะมือข้างหนึ่งจับผม แล้วกะหวีๆๆๆ หวีลงไป
แล้วเป็นหญังเขาคือหวีผม กะบ่ฮู้คือกัน ผมเขาอาดสิหญุ้ง หลือว่าผมเขาอาดสิหญอง มันข้องกันจั่งซี้เนาะ เขากะต้องใซ้หวี หวีผมลงไป ให้มันเป็นเส้นของใผของมัน บ่ให้มันไปหญุ้งกัน หลือว่าไปข้องกันเนาะ
แล้วผมของเขาญาวบ่ กะญาวเด่ะ เบิ่งลักสะนะแล้วญาวเติบ ญาวคักอยู่ ญาว บักญาวหนึ่ง เลยบ่าไปอีก ฮอดนมฮอดเอิกพุ้นหนะ ผมของเขากะเลยญาวคักญาวแน่ ไว้จั่งใดญาวแท้ ผมนั้นกะเดย
Basic vocabulary — Page 32 — Series B, pictures 08-10: motorbike, horn, loud, TV, pick-up truck, drum
อันนี้คืออี่หยัง กะมีเหดกานหนึ่งเนาะ มีเหดกานหนึ่งอยู่ในโทละทัดเนาะ กะมีคนหนึ่งกำลังเบิ่งโทละทัดอยู่เนาะ อยู่ในบ้านของเขานั้นหละ
กะมีคนอยู่ในโทละทัดนั้น กำลังขับมอเตอไซอยู่ มอเตอไซ มอเตอไซสีเขียว ขับคนเดียวนั้นหละ ใส่หมวกพ้อม เสียงดังซ้ำแมะ เสียงดัง อาดสิ เขาเอิ้นว่าอี่หยังเกาะ เบิ้นแฮงเนาะ เบิ้นคันเล่งแฮง กะสิเป็นลดคันขี่เสียงดังคัก ปะมานนั้นเนาะ หลือว่าสิบีบแกกะได้ บีบแก ติ่กๆๆๆๆ เสียงดังเนาะ
9
มีคนคนหนึ่งเขากำลังเฮ็ดหญัง กะมีคนหนึ่ง เขากำลังขับลดเนาะ เป็นลดพิกอั่บ ลดพิกอั่บคันบักใหญ่เอาโลด คันสีแดง
เขากำลังขับไปเลี้ยยๆ เลี้ยยๆ ของเขานั้นหละ เบิ่งท่าทาง เบิ่งมือของเขาแล้วกำลังหมุนพวงมาลัยอยู่ แล้วกะเบิ่งลักสะนะ หลือว่าเหดกานตอนนั้น เขากำลังบีบแก บีบแกเสียงดังซ้ำแมะ
แล้วเป็นหญังเขาต้องบีบแก อาดสิมีเหดกานบางสิ่งบางอย่างที่เพื่อเตือนสะติคนที่อยู่ข้างๆ หลือว่าคนที่อยู่นอกลด หลือว่าคนที่อยู่ข้างหน้านั้น เพื่อที่ว่าให้บอกเหดกานบางสิ่งบางอย่าง หลือว่าเป็นกานแจ้งเตือนว่าให้หลบไปหลือว่าให้ลี้ไป ปะมานนั้นเนาะ แล้วกะบีบ บีบแกใส่เขาเนาะ
หลืออาดสิมีคนที่อยู่ข้างหน้าขับลดแบบบ่ดี ขับลดที่บ่ดี กะสิเป็นกานเตือนกะได้เนาะ บีบแก กะสิเป็นกานเตือนอีกแบบหนึ่งว่าให้เฮ็ดอีกแบบใหม่ ให้เฮ็ดดีกว่านี้ ปะมานนั้นเนาะ
10
เขากำลังเฮ็ดหญัง กะมีพุซายพุหนึ่งเนาะ กำลังตีกอง
ตีกองใซ้มือสองข้างเขานั้นหละ ข้างหนึ่งกะจับไม้กอง ข้างหนึ่งกะจับไม้กอง เทิงข้างซ้ายข้างขวา กำลังตีกองปะโล่งโป่งเป่ง ตีกองอยู่พุเดียวของเขานั้นหละ
แล้วเขาตีกองเฮ็ดหญัง เขากะอาดสิม่วน หลือว่าอาดสิมีกิดจะกัมบางสิ่งบางอย่างที่ต้องใซ้กองตี เพื่อที่ว่าสิมีกานล้องเพงกัน แล้วเขากะอาดสิตีกอง
แล้วกองนี้มันเสียงดังบ่ กานตีกองนี้กะเสียงดังพอสมควนเนาะ กะเสียงดังเติบ แล้วแต่ว่าแฮง เฮาสิตีค่อย ตีแฮง ตีเบา ตีบ่เบา ตีแฮงส่ำใด กะดังส่ำนั้น ตีค่อยส่ำใด กะค่อยส่ำนั้น
แล้วตีกองหนิมันม่วนบ่ กะอาดสิม่วนอีกแบบหนึ่งเนาะ อาดสิว่า อาดสิเป็นแบบว่าตีให้มันเข้าจังหวะกานล้องเพง หลือว่าทำนองเพงหนะตอนนั้นเนาะ กะตี ตีม่วนกะม่วน พุใดตีเป็นกะม่วน ตีบ่เป็นกะบ่ม่วนส่ำนั้นหละเนาะ
Basic vocabulary — Page 29 — Series B, pictures 01-03: waiter/waitress, tray, to serve, drinks, food, bill
นี้คือพุใด อันนี้เป็นเด็กเสิบ เขาเอิ้นว่าเด็กเสิบ
เด็กเสิบนี้เฮ็ดหญัง เด็กเสิบมีหน้าที่เฮ็ดหญัง เด็กเสิบกะมีหน้าที่เสิบ หลือว่าบอลิกาน บอลิกานให้กับลูกค้า หลือว่าบอลิกานในสิ่งต่างๆ ที่เขาเฮ็ดทุละกิดนั้น
ขั้นเฮ็ดอยู่ในล้านอาหาน เขากะต้องเสิบน้ำเสิบแนวกิน หลือว่าบอลิกานทุกอย่างที่อยู่ในล้านอาหาน หลือว่าล้านแนวกิน
ขั้นเขาเป็นพะนักงานอยู่ในล้านเหล้าหลือว่าอี่หยัง เขากะซ่อยบอลิกานเกี่ยวกับเหล้า หลือว่าเกี่ยวกับในล้านอันนั้นเนาะ เขากะสิเอิ้นว่าเด็กเสิบ
แล้วเป็นหญังเขาคือแต่งโตแบบนี้ หลือว่า เด็กเสิบต้องแต่งโตคือกันเบิดซู่พุซู่คน หลือว่าคือกันทั่วปะเทดหลือว่าทั่วโลก บ่ แล้วแต่ แล้วแต่ซุดของเขา ว่าเขาสิใส่ซุดแบบใด ว่าเขา ว่าล้านอันนั้นหนะ ว่าล้านที่เขาเฮ็ดอยู่หนะ สิใส่ซุดแบบใด เขาบังคับให้ใส่ซุดแบบนี้ๆ เฮากะต้องใส่ตามล้าน หลือว่าตามหม้องที่เขาเฮ็ดงานเนาะ
หลือว่าบางหม้องกะให้แต่งโตแบบสุพาบ เลียบล้อย หลือว่าเป็นตาเบิ่ง เพื่อที่ว่าลูกค้า หลือว่าคนที่มาใซ้บอลิกาน สิได้แนม สิได้เห็นว่าสุพาบเลียบล้อย หลือว่าเป็นตาเบิ่ง เป็นตามักกินล้านนี้อีกต่อไป แบบจั่งซี้เนาะ
แล้วตอนนี้เขากำลังเฮ็ดหญังอยู่ กะเห็น แนมไปแล้วกะเห็นเขาถือถาด ถาดน้ำเนาะ กำลังถือแก้วน้ำอยู่สามแก้ว น้ำสีฟ้าสองแก้ว น้ำสีเขียวอีกแก้วหนึ่ง
ล่วมกันเป็นสามแก้ว กำลังอาดสิเอาไปเสิบลูกค้า หลือว่าเสิบพุมาใซ้บอลิกานอยู่ในล้านของเขาเนาะ
2
เขากำลังเฮ็ดหญังอยู่ กะมีเด็กเสิบคือกันหนิหละ เป็นเด็กเสิบเนาะ เด็กเสิบพุซาย
กำลังถือถาดแนวกินเนาะ มีแนวกินถ้วยหนึ่งกับเข้าเจ้าอีกจานหนึ่งเนาะ กำลังสิเอาไปเสิบลุกค้า หลือว่าคนมาใซ้บอลิกานนี้ในล้านนั้นหละเนาะ
3
เด็กเสิบคนนี้เขากำลังเฮ็ดหญัง กะเด็กเสิบพุหนึ่งเนาะ เป็นเด็กเสิบพุซาย เขากำลังถือกะดานอันหนึ่งเนาะ เบิ่งแล้ว ลักสะนะแล้วเป็นบิน บินเงิน หลือว่าบินค่าแนวกินที่ลูกค้ามาใซ้บอลิกาน หลือว่ามากินเข้าล้านเขาแล้ว เขากะต้องเป็น เขาเอิ้นว่า เก็บเงินเนาะ กะสิมีบินค่าลายกานต่างๆ ลายกานหนึ่ง ลายกานสองว่าแนวกินอี่หยัง แนวกินอี่หยังกะเขียนไว้ตามนั้นหละ ลาคาจักบาทๆๆ แล้วกะล่วมกัน เขากะสิเอิ้นว่า บินค่าแนวกิน เนาะ
แล้วเด็กเสิบคนนี้กะเอาญกขึ้นสูง เพื่อสิว่า เพื่อว่าที่สิโซให้ลูกค้าเบิ่งว่ามันจักบาทๆ แล้วกะลูกค้าสิได้จ่ายเงินตามจำนวนที่ลูกค้ากินไป หลือว่าตามในบินใบเส็ดนี้เนาะ
Basic vocabulary — page 16 — Series B, pictures 05-08: fan, to switch on/off
นี้คืออี่หยัง นี้คือพัดลม เป็นพัดลมตั้งโต่ะ หลือเป็นพัดลมตั้งพื้น บ่แม่นพัดลมฝาผะหนัง
พัดลมอันนี้เอาไว้เฮ็ดหญัง เอาไว้ถ้าเฮ็ดให้ความเย็น ไว้ถ้าเพิ้มความเย็นนั้นหละ
ญามเวลาฮ้อน หลืออากาดฮ้อน เฮาสามาดเปิดพัดลมนี้ได้ แล้วสิเฮ็ดให้อากาดเย็น หลือเฮ็ดให้เฮาเย็นนั้นหละ
พัดลมอันนี้ใซ้งานจั่งใด พัดลมอันนี้สิมีสายไฟ เสียบปั่กไฟฟ้า แล้วกะสิมีปุ่มเปิดกับปุ่มปิด
ขั้นเฮาสิใซ้งานพัดลมอันนี้ เฮากะเสียบปั่กไฟฟ้า แล้วเฮากะเปิดปุ่มเปิด แล้วมันกะสิติด แล้วพัดลมกะสิสามาดใซ้งานได้
พัดลมอันนี้ใซ้ไฟฟ้าบ่ ใซ้อยู่ พัดลมอันนี้ใซ้ไฟฟ้าพ้อม ขั้นบ่มีไฟฟ้า มันกะเปิดบ่ติด ขั้นมีไฟฟ้า มันกะสามาดใซ้งานได้
6
เขากำลังเฮ็ดหญัง เขากำลังเปิดพัดลม
เป็นหญังเขาคือเปิดพัดลม บ่ลู้คือกัน เขาอาดสิฮ้อน หลืออากาดมันฮ้อน เขากะเลยเปิดพัดลม เพื่อเพิ้มความเย็นกะได้
คือฮู้ว่าเขาเปิดพัดลม กะฮู้เพาะว่า เขากำลังเปิดปุ่มเปิดพัดลม แล้วพัดลมมันกำลังหมุนอยู่ พัดลมมันกำลังใซ้งานอยู่ กะเลยฮู้ว่าเขากำลังเปิดพัดลม
เป็นหญังเขาคือกดปุ่ม กะต้องกดปุ่ม เพาะว่า ขั้นบ่กดปุ่ม มันกะบ่ติด เพาะว่า ต้องกดปุ่มเปิดกับปุ่มปิด ขั้นสิเปิดพัดลม กะต้องเปิดปุ่มเปิด ขั้นสิปิดพัดลม กะต้องปิดปุ่มปิด
7
พัดลมมันกำลังเป็นหญัง พัดลมมันเป็นอี่หยังอยู่ตอนนี้ พัดลมมันกำลังเปิดอยู่ พัดลมมันกำลังใซ้งานอยู่ เพาะว่ามีคนไปเปิดพัดลม หลือใซ้งานพัดลม แล้วเฮ็ดให้พัดลมหมุน หลือพัดลมใซ้งานอยู่
ตอนนี้มันเย็นบ่ กะเย็นอยู่ เพาะว่าเปิดพัดลมแล้ว พัดลมกะสิเพิ้มความเย็นให้เฮา สิเฮ็ดให้อากาดเย็น สิเฮ็ดให้มันเย็นขึ้น
ขั้นมันเย็นแล้วมันสิคายความฮ้อนบ่ กะคายความฮ้อนอยู่ ขั้นเปิดพัดลมแล้ว มันกะสิเฮ็ดให้เย็น บ่เฮ็ดให้ฮ้อน สิเฮ็ดให้อากาดเย็นขึ้น
พัดลมโตนี้มันมีเสียงบ่ พัดลมโตนี้มันเสียงดังบ่ กะเสียงดังอยู่ แต่บ่เสียงดังหลาย กะแล้วแต่โต แล้วแต่ลุ้น
ขั้นลุ้นใดเสียงแฮง มันกะเสียงแฮง ขั้นลุ้นใดเสียงเบา มันกะเสียงเบา แล้วแต่ลุ้น แล้วแต่ยี้ฮ้อพัดลม
พัดลมโตนี้มันหมุนเล็วบ่ กะหมุนเล็วอยู่ เพาะว่าขั้นหมุนเล็ว มันกะเย็น มันกะเย็นคัก เย็นคักอี่หลี ขั้นมันหมุนซ้า มันกะสิบ่เย็น มันกะสิเย็นหน่อยเดียว บ่เย็นคัก
8
เขากำลังเฮ็ดหญัง เขากำลังปิดพัดลม
เป็นหญังเขาคือปิดพัดลม อันนี้กะบ่ลู้คือกัน เขาอาดสิบ่ใซ้งานพัดลมแล้วกะได้ เขากะเลยปิดพัดลม
คือฮู้ว่าเขาปิดพัดลม กะฮู้เพาะว่าเขากำลังกดปุ่มปิดพัดลม แล้วพัดลมมันกำลังหยุด พัดลมมันบ่ได้ใซ้งาน กะเลยฮู้ว่า เขากำลังปิดพัดลม เขากำลังบ่ใซ้งานพัดลมอยู่
Basic vocabulary — Page 26 — Series B, pictures 01-05: monk, to good to receive food offerings, Buddha statue, temple, stupa
อันนี้เพิ่นเป็นพุใด เพิ่นเป็นพะ
เป็นหญังคือเอิ้นว่าพะ เป็นหญังคือเป็นพะ กะเพิ่นบวดแล้ว เพิ่นบวด กะเลยเอิ้นว่าพะ
กานเอิ้นกะสิมีสองแบบ ขั้นพุซายบวด สิเอิ้นว่าพะ ขั้นพุหญิงบวด หลือว่าแม่หญิงบวด สิเอิ้นว่าแม่ซี แต่ว่าอันนี้เพิ่นเป็นพุซาย กะเลยเอิ้นว่าพะ
พะเพิ่นใส่ซุดสีหญัง พะเพิ่นกะใส่แต่สีเดียว สีเหลียงหลือว่าสีส้มส่ำนั้นหละ บ่ให้ใส่สีอื่น สีแดง สีซมพู สีดำ เพิ่นบ่ให้ใส่ ให้ใส่แค่สีเดียว
2
พะเพิ่นกำลังเฮ็ดหญัง พะเพิ่นกำลังสิบินทะบาด พะเพิ่นกำลังสิไปบินทะบาด
บินทะบาดอยู่ใส กะอาดสิไปบินทะบาดลอบบ้าน หลือว่าอ้อมหมู่บ้านหนั้นหละ หม้องใดมีพุคน หลือว่ามีคนอยู่หนั้น เพิ่นกะสิไปบินทะบาดอยู่หั้น
ขั้นบ้านใดสิใส่บาด เพิ่นกะไปบ้านนั้น ขั้นบ้านใดบ่ใส่ เพิ่นกะญ่างผ่านไป
กานบินทะบาดของพะนี้กะสิไปแค่มื้อละเที่ย ไปแต่ญามเซ้า ตื่นขึ้นหกโมง ทำวัดอี่หยังเส็ด กะไปบินทะบาดญามมื้อเซ้า
แล้วญามเที่ยงพะสิออกไปบินทะบาดบ่ บ่ บ่ไป พะสิบินทะบาดเที่ยเดียว ญามเที่ยงญามแลงบ่บินทะบาดเนาะ
3
อันนี้คืออี่หยัง อันนี้กะเป็นพะพุดทะลูบ เป็นพะพุดทะลูบตั้งอยู่
พะพุดทะลูบเอาไว้เฮ็ดหญัง พะพุดทะลูบกะเอาไว้ถ้ากาบไหว้ เป็นที่กาบไหว้ของพุคน พุคนสิมักมากาบมาไหว้อยู่หม้องนี้ หลือว่าพุใดอยู่ใก้ อยู่แถวๆ นี้ กะสิมาไหว้พะพุดทะลูบอยู่หม้องนี้
พะพุดทะลูบนี้มีซีวิดบ่ บ่ พะพุดทะลูบบ่มีซีวิด เป็นสิ่งที่เฮ็ดขึ้นมา ปั่นขึ้นมา เพื่อให้เป็นสิ่งที่คนเคาลบหลือว่ากาบไหว้หนั้นหละ
4
อันนี้คืออี่หยัง อันนี้เป็นสาลา เป็นสาลาวัด หลือว่าสาลาปะเลียนนั้นหละ
พะอาดสิมาสันเข้า หลือว่าสันเข้าเซ้า สันเพน หลือว่าจำวัด จำสีนวัด กะเฮ็ดอยู่หม้องนี้เบิดซู่อย่าง อาดสิมีกิดจะกัม ชาวบ้านอี่หยังมาเฮ็ด กะอาดสิมาเฮ็ดกิดจะกัมอยู่นี้ เกี่ยวกับวัด เกี่ยวกับสาสะนา หลือว่าพะทัมเนาะ สิสามาดมาเฮ็ดได้อยู่หม้องนี้
แล้วสาลานี้ตั้งอยู่ใส สาลานี้กะตั้งอยู่ในวัด ส้างขึ้นอยู่ในวัด
5
อันนี้คืออี่หยัง อันนี้เอิ้นว่าเจดี หลือว่าพะทาดเจดีนั้นหละ แล้วแต่คนสิเอิ้น แล้วแต่คนสิเว้า
พะทาดหลือว่าเจดีนี้เฮ็ดมาจากอี่หยัง บางหม้องกะเฮ็ดมาจากดิน บางหม้องกะเฮ็ดมาจากปูน บางหม้องเฮ็ดมาจากเหล็กจากไม้ แล้วแต่สิเฮ็ด แล้วแต่คนสิคิดเฮ็ดว่า เฮ็ดแบบใด เฮ็ดจั่งใด เฮ็ดเพี่ยอี่หยัง ปะมานนั้นเนาะ
แล้วพะทาดหลือว่าเจดีนี้เป็นสิ่งสักสิดบ่ หลือว่าคนเคาลบ คนไหว้ คนกาบ คนหญังบ่ กะมีส่วนอยู่ บางเจดีกะเฮ็ดเพื่อให้คนเคาลบหลือว่านับถือ บางเจดีกะเฮ็ดเป็นหม้องที่ใส่กะดูกคนที่ตายไปแล้ว หลือว่ากะดูกของพะพุดทะเจ้า หลือว่ากะดูกของพะของคนที่ตายไปแล้วหนั้นหละ
Basic vocabulary — Page 27 — Series B, pictures 04-07: moustache, beard, to shave, razor, razor blade
นี้คือพุใด จักคือกัน บ่ฮู้ว่าเขาเป็นใผ ฮู้แต่ว่าเขาเป็นพุซาย
หน้าตาเขาเป็นจั่งใด หน้าตาเขามีหนวด มีหนวดพ้อม หนวดสีดำๆ
หนวดคืออี่หยัง หนวดกะเป็นหนวดที่มันเกิดเป็นขนอยู่ใต้ดัง หลือว่าอยู่เทิงปาก
หนวดนี้มันเส้นญาวบ่ แล้วแต่ แล้วแต่หนวดของคน บางคนกะหนวดญาว บางคนกะหนวดสั้น แล้วแต่เขาสิจ่ง แล้วแต่เขาสิไว้
แล้วคนคนนี้ ผมกับหนวดของเขา อี่หยังญาวกว่ากัน กะผมเลยเนาะ ผมของเขาญาวกว่าหนวด หนวดของเขาสั้นๆ หนึ่ง หนวดของเขาบ่ญาวหลาย ญาวพอดี ญาวหน่อยเดียว
5
เขามีหน้าตาเป็นจั่งใด หน้าตาของเขามีหนวดพ้อม เทิงหนวดเทิงเคา ผมกะญาว เฮ็ดปึ่กซึกอยู่
หนวดกับเคาหนิคือกันบ่ กะค้ายๆ กัน หนวดกะคือสิเกิดอยู่เทิงปาก หลือว่าอยู่ใต้ดัง หม้องนั้นหละ แล้วกะสิเกิดอยู่ใต้ปากหน่อยหนึ่ง
แล้วเคาเด๊ เกิดอยู่ใส เคานั้นกะสิเกิดอยู่ใต้คาง เขากะสิเอิ้นว่าเคา เพาะสะนั้นแล้วหนวดกับเคาสิเกิดอยู่คนละหม้อง เกิดอยู่คนละบ่อน
ผมกับหนวดหนิคือกันบ่ บ่ ผมกะสิเกิดอยู่เทิงหัว หลือว่าเกิดอยู่หัวของเฮา หนวดกับเคากะสิเกิดอยู่หม้องที่เอ่ยไปหลือว่าเว้าไปหนั้นหละ
แล้วคนเฮานี้สิมักไว้หนวดไว้เคาบ่ กะแล้วแต่ แล้วแต่คนมัก พุใดมักกะจ่งหลือว่าเอาไว้ พุใดบ่มักกะโกนออกหลือว่าบ่จ่งไว้หนั้นหละ
6
นี้คืออี่หยัง อันนี้คือแนวโกนหนวด แล้วกะมีดโกนหนวดพ้อม
แนวโกนหนวดเอาไว้เฮ็ดหญัง กะเอาไว้ถ้าโกนหนวดหนั้นหละ เอาไว้ถ้าตัดหนวดหลือว่าโกนหนวดออกจากปากหลือว่าจากคางของเฮา เพื่อสิให้มันเกี้ยงเกา หลือว่าบ่ให้มันมีหนวดญาวหนั้นหละ
แนวโกนหนวดเป็นจั่งใด แนวโกนหนวดหนั้นกะสิเป็นสีขาวๆ เป็นฟองขาวๆ เอาไว้ถ้าบีบใส่เส้นหนวดของเฮา หลือว่าเส้น เส้นขนของเฮา เพื่อที่เฮาสิโกนออก กะใซ้มีดโกนที่มันคมๆ กะมาโกนออกๆ เพื่อที่สิตัดขนนั้นออก บ่ให้มันมีขนอยู่หน้าของเฮา
มีดโกนหนิกะเฮ็ดจากอี่หยัง กะเฮ็ดจากมีด เพาะว่ามันต้องคม มันต้องมีคมคัก แล้วมันกะต้องสามาดตัดขนได้พ้อม มันจั่งสิเป็นมีดโกนหนวด
7
เขากำลังเฮ็ดหญังอยู่ พุซายพุหนึ่ง เขากำลังโกนหนวดอยู่
เขาโกนหนวดจั่งใด เขากะใซ้แนวโกนหนวดแล้วกะมีดโกนหนวดกำลังโกนหนวดของเขา
เขาเอาแนวโกนหนวดบีบใส่ใส กะบีบใส่หม้องคาง หลือว่าใส่ปากของเขา หลือว่าใส่หม้องหนวดที่เขามี หลือว่าหม้องที่หนวดมันเกิด
เป็นหญังเขาต้องบีบใส่หม้องหั้น กะญ้อนว่าเขาอยากโกน เขากะเลยบีบใส่หม้องหั้น
อยากโกนหม้องใด อยากโกนหนวดหม้องใดออก กะบีบใส่หม้องหนั้น หม้องใดบ่อยากโกน กะบ่ต้องบีบใส่
บีบใส่แล้วเฮ็ดจั่งใดต่อไป บีบใส่แล้วๆ กะบีบใส่พอปะมาน หลือว่าให้มันพอดีกับหนวดของเฮา แล้วเฮากะใซ้มีดโกนๆๆ ออก หลือว่าตัดๆๆ ออก แล้วหนวดของเฮากะสิบ่มี หลือว่าหนวดของเฮากะสิหายไป สิเฮ็ดให้หน้าเฮาเกี้ยงเกา หลือว่าบ่มีหนวดเลย